Derana Dream Star කිරුළ පදවියට

පසුගියදා නිමාවට පත් වු ඩ්‍රීම් ස්ටාර් 4 වන අදියරේ කිරුළ දිනා ගත්තේ සසිඳු විජෙසිරි ය. ඔක්කෝට ම කලියෙන් සසිඳුට අපේ සුබ පැතුම් එකතු කරනවා. මෑතකාලින ලංකාවේ ජනප්‍රිය සංස්කෘතිය තුළ රියැලටි වැඩසටහන් ලොකු වැඩ කොටසක් ඉටු කරනවා. සිරස ගෙනාපු මේ අමුතු වැඩසටහන අපට අලුත් අත්දැකීමක් වුණාට ඒක ලෝකය පුරා ජනප්‍රිය වෙච්ච දෙයක්. ජනප්‍රිය නාලිකාත් හැම එකක් ම වගේ ලහි ලහියේ ඒ අත්දකීම් දේශිය අනන්‍යතාවක් තුළ ‍ප්‍රේක්ෂකයා වෙත ලබා දෙන්න උත්සුක වෙනවා. එක් අදියරක් ඉවර වෙද්දි අනෙත් අදියර. තරගකරුවන්ට විතරක් නෙවෙයි ප්‍රේකෂකයාට ද විරාමයක් නොතියන රියැලටි වැඩසටහන් ආලින්දයේ ගජ මිතුරකු තරමට අපට සමීප වෙලා.

පදවිය වැනි දුෂ්කර ප්‍රදේශයක තරුණයකු වෙත ඩ්‍රීම් ස්ටාර් කිරුළ හිමි වීම කාගෙත් කථාබහට ලක් විය. සසිඳු හා කරට කර තරග වැදුණු අනෙක් දෙදෙනා සිතුම් හා රවීන් ය. කෙසේ වෙතත් ඔවුන් තිදෙනාගේ ම ඉරණම එස්.එම්.එස් මනාප අනුව තීරණය විය. තිදෙනා ම දක්ෂයන් බව සැබෑ ය. නැතිනම් ලක්ෂ ගණනකින් ‍තේරි අවසන් තිදෙනා අතරට එන්නට කොහෙත් ම බැරි ය.

සසිඳුට ඇත්තේ ඔහුට ම ආවේණික කටහඩකි. එය ළයාන්විත ය. විරහව දනවන්නේ ය. සිතුම්ට ඇත්තේ ගැඹුරු භාවපූර්ණ කටහඩකි. ඔහු ඉහළ දක්ෂතා පෙන් වූ සිහින තරුවකි. රවීන්ට ඇත්තේ ප්‍රේමාන්විත කටහඩකි. ඔහු ප්‍රාසාංගික බවින් අනෙක් තිදෙනා ම අභිබවා සිටියි. ඒ නිසාදෝ කාගේත් කල්පනාව වුණේ රවීන් ඩ්‍රීම් ස්ටාර් කිරුළ දිනා ගනු ඇත යන්නයි.

කෙසේ වෙතත් දැන් ඩ්‍රීම් ස්ටාර් හි 4 වන අදියර ද අවසන් ය. ජයග්‍රාහකයා ද ‍තෝරා අවසන් ය. ඩ්‍රීම් ස්ටාර් කුළුදුල් සම්ප්‍රාප්තියේ ජයග්‍රාහකයා ඉන්දුල ය. දෙවැනි සිහින තරුව උ‍පේඛා ය. තෙවන අදියර ජය ගත්තේ කේෂාන් ය. ඔවුන් තිදෙනා මේ වන විට සිංහල ගීත කේෂත්‍රයේ තමන්ගේ අනන්‍යාතාව ගොඩ නගා ගනිමින් සිටී. සසිඳු ද එසේ තමන්ගේ ම ගායන පෞරුෂයක් ගොඩ නගා ගනිමින් සිංහල ගීතය පෝෂණය කරනු ඇත. එය සසිඳු සිහින තරුව ලෙස අභිෂේක කළ රසික ජනතාවගේ ද අපේක්ෂා මල්ඵල ගැන්වීමක් වනු ඇත.